/197/ EXERCITATIO XXX
Aristotelis sententiam explicat.
Divinum Aristotelem Stagiritam, humanae
sapientiae patrem, primum
ac summum scientiarum omnium dictatorem
et venerabile Naturae oraculum, ad
epicureismum pertrahere conatur Chalcidius
Platonicus. Asserit enim in Platonis Timaeo
Aristotelem concessisse divinam providentiam
curare tantum aeterna secundum
individuum, qualia sunt corpora coelestia,
non autem haec sublunaria. Chalcidio circumforaneo
blateroni moderni quidam
philosophastri adstipulantur, duabus ratiunculis
et illis quidem levissimis persuasi.
Prima: Quia, in libro 12. Metwphysicorum, cap. 9., dicit absurdum
esse primam mentem de rebus omnibus
cogitare, et melius esse quaedam non
videre quam videre.
Secunda: Ex Aristotelis sententia Deus non
potest in haec inferiora agere nisi medio
corpore coeli. Ergo, ex Aristotele, Deus non
curat haec inferiora.
Quae opinio falsa est et immerito adscripta
divino viro. Falsa quidem et seipsam destruit.
Singulis enim quasi momentis, videmus